1 наурыз — Қазақстанда мейірімділік, достық пен өзара құрметтің символына айналған Алғыс айту күні. Осы айтулы күнге орай Қаратал ауданы, Бастөбе ауылындағы «Қазақ халқына мың алғыс!» монументінің алдында «Алғыс – бірлік бастауы» атты салтанатты ақпараттық-танымдық шара ұйымдастырылды.
Бұл нысанның таңдалуы тегін емес: Бастөбе жері — қиын-қыстау заманда көптеген этнос өкілдеріне пана болған, қазақ қонақжайлылығының тірі куәгері.
Тағзым мен құрмет
Шараның шымылдығы дәстүрлі түрде «Қазақ халқына мың алғыс!» монументіне гүл шоқтарын қою рәсімімен ашылды. Қатысушылар ел бірлігі жолында еңбек еткен азаматтарды еске алып, татулық пен келісімге қызмет етіп жүрген замандастарға құрмет көрсетті.
Рухани бірлік үні
Жиын барысында өңірдің дамуына және қоғамдық келісімді нығайтуға үлес қосып жүрген тұлғалар сөз сөйледі:
- Келемсейіт Ермек Әбілмәжінұлы (Жетісу облыстық Ақсақалдар кеңесінің төрағасы): Ақсақал өз сөзінде алғыс айтудың тәрбиелік мәніне тоқталып, ұрпақтар сабақтастығының маңыздылығын атап өтті.
- Виктор Иванович Пак (Жетісу облыстық корей этномәдени бірлестігінің ақсақалы): Виктор Иванович қиын кезеңде қол ұшын созған қазақ халқына деген шексіз ризашылығын білдіріп, достық туының биік болатынына сенім білдірді.
- Досымбеков Ұлан Әлдибекұлы (Қаратал ауданының әкімі): Аудан басшысы мерекенің мемлекеттік тұтастықты нығайтудағы рөлін тілге тиек етіп, барша тұрғындарды бірлікке шақырды.
«Ардагерлер мен Ассамблея жастарының осындай шараларға бірлесе қатысуы — қоғамымыздағы алғыс айту мәдениеті мен этносаралық татулықтың берік іргетасы қаланғанының айқын дәлелі», — деп атап өтті ұйымдастырушылар.
ЛЯЗЗАТ МУХАМЕДЖАН