Мерекелік шаралар тек алаңдар мен залдарда ғана емес, ел бірлігінің бастауында тұрған аға буын өкілдерінің шаңырағында жалғасын тапты. Алғыс айту күні аясында ұйымдастырушылар Қазақстан халқы Ассамблеясының дамуына өлшеусіз үлес қосқан еңбек сіңірген ардагерлерді арнайы барып құттықтады.
Бұл игі бастаманың астарында терең мағына жатыр. Сый-сияпат табыстау – бұл жай ғана сыйлық емес, бұл – үлкенге құрмет, өткенге тағзым және еліміздегі бейбітшілік пен татулықты сақтау жолында адал қызмет еткен азаматтарға деген шынайы ризашылықтың белгісі.
Ізгілік пен ұрпақ сабақтастығы
Кездесу барысында ардагерлер өздерінің еңбек жолдарындағы қызықты сәттермен бөлісіп, ел болашағы – жастарға ақ баталарын берді. Ұйымдастырушылар әрбір ардагердің есімі ел тарихында, әсіресе этносаралық келісімді нығайту ісінде алтын әріппен жазылатынын атап өтті.
«Бүгінгі біздің бақытты тірлігіміз бен берекелі бірлігіміз – осы кісілер салған сара жолдың жемісі. Сондықтан оларды ұлықтау – біздің парызымыз», – деді ұйымдастырушылар.
Мұндай жылы кездесулер қоғамдағы «саналы ата-ана – саналы ұрпақ» қағидасын нығайтып, жастардың бойындағы отансүйгіштік сезімін арттыра түсері сөзсіз.
ЛЯЗЗАТ МУХАМЕДЖАН